Rini Tri Puspohardini
Ing dalan pating klebet
Abang ijo kuning lan biru
Sakawit aku ngira
Pengetan kamardikan wis meh teka
Utawa pentas dhangdhut ing lapangan
Jebul ora
Sing mobat-mabit katiyup angin kae
Dudu umbul-umbul iklan rokok
Nanging sajak luwih dening semuwa
Gendera kang mapag krisis negara
Nanging sapa sing bisa percaya?
Ing kene dhuwit pating bleber ngarep irung
Akeh begawan mudhun gunung
Grapyak semanak ngumbar esem turut lurung
Oh, saiki aku ngerti
Sing pating klebet abang ijo kuning lan biru
Jebul gendera lelayu
Atur bela sungkawa
Marang patine ewuh pakewuh
Lan sadhengah rasa duweke calon punggawa
Sumber: Kidung saka Bandungan, 2004
Lengen Kiwa Ibu
dening : Yusuf Susilo Hartono
Lengen kiwa Ibu yaiku suwarga
tumprape sadhengah uwong
Ing lengen kono bayi-bayi Jawa dikudang
karo selendhang bathik lan gendhing dolanan
Lengen kiwa ibu tansah sabar dadi bantal
pangimpen tarunaning bangsa
Nanging saiki lengen kiwa ibu-ibu mudha
kang alus mulus lan wangi
wis ora nampa pangimpen lan eluh tumetes
saka tangis geter nalika wis ana baby sitter
Malahan ing dina mburi iki, “kartini-kartini”
akeh kang katut kabudayan urip nglajang
lan suwarga ing dlamakane dimen muspra
kemajuan jaman jarene
0 Response to "Geguritan Bahasa Jawa "Gendera", "Lengen Kiwa Ibu""
Post a Comment